अनिष्टकारी कदम फिर्ता लेऊः साझा पार्टी

काठमाण्डौं। साझा पार्टीले सरकारले जारी गरेका दुई अध्यादेश अनिष्टकारी भएको भन्दै फिर्ता लिन माग गरेको छ। पार्टीका संयोजक रवीन्द्र मिश्रले मङ्गलवार विज्ञप्ति जारी गर्दै अध्यादेशले प्रधानमन्त्री केपी ओलीको अधिनायकवाद तर्फको डर लाग्दो आकाङ्क्षा प्रकट भएको बताएका छन्।

साझाले झण्डै दुई तिहाइ जनमत पाएर शासन गरिरहेको सरकारले सरकार गठन भएको दुई वर्ष भन्दा बढी समयमा जनतालाई काण्डैकाण्डका ठेली दिएर विश्वास गुमाएपछि आफूलाई सत्तामा राखिरहन प्रधानमन्त्रीमा निरङ्कुश सोच हावी भएको उल्लेख गरिएको छ।

देश कोरोना भाइरस सङ्क्रमणका कारण कठिन परिस्थितिबाट गुज्रिरहेको बेला राजनीतिक दल र संवैधानिक परिषद सम्बन्धी अध्यादेश ल्याउनु मानवीय विवेक र राजकीय जिम्मेवारी बोध विपरित भएको साझाको ठहर छ।

सरकारले ल्याएको अध्यादेशले लोकतन्त्रलाई नै सङ्कटतर्फ उन्मुख गराएको भन्दै यो परिस्थिति बदल्न मातृभूमीको हित र रक्षाका लागि सबै राजनीतिकर्मी र आम नेपालीहरूलाई राजनीतिक मतभेद छोडेर एक हुन पनि साझाले अपिल गरेको छ।

विज्ञप्तिको पूर्णपाठः 

अध्यादेश: अधिनायकवादको स्पष्ट आकांक्षा

नेपाल सरकारले सोमबार जारी गरेको दुई अध्यादेशबाट प्रधानमन्त्री केपी ओलीको अधिनायकवादतर्फको डरलाग्दो आकांक्षा प्रकट भएको साझा पार्टीको ठहर छ। उक्त अनिष्टकारी कदम तुरुन्त फिर्ता लिन साझा पार्टी जोडदार माग गर्दछ।

झण्डै दुई-तिहाई जनमत पाएर शासन गरिरहेको सरकारले गत दुई वर्षभन्दा बढी समयमा जनतालाई काण्डैकाण्डको ठेली दिएर आम विश्वास गुमाएपछि, आफूलाई सत्तामा कायम राख्न प्रधानमन्त्रीमा स्पष्टत: निरंकुश, व्यक्तिवादी सोच हावि भएको देखिन्छ।

दुबै अध्यादेश प्रधानमन्त्री ओलीद्वारा आफ्नै पार्टीका अर्का अध्यक्ष तथा शीर्ष नेतृत्वसँग समेत छलफल नगरी छापामार शैलीमा मन्त्रीपरिषद्को बैठकमा पेश गरिएको थियो।

देश कोरोनाभाइरस संक्रमणका कारण कठिन र अनिश्चयको परिस्थितिबाट गुज्रिरहेको बेला थोरैमात्र मानवीय विवेक र राजकीय जिम्मेवारीको वोध भएको नेताले गर्नै नसक्ने काम प्रधानमन्त्रीबाट भएको छ।

संसदमा बलियो जनमत हुँदाहुँदै संसदबाट नभइ पार्टी फूट र जुटको घृणित राजनीति तथा संवैधानिक निकायमाथिको पूर्ण नियन्त्रणबाट शासन चलाउन खोज्नु नेपालको दशकौँको लोकतान्त्रिक संघर्षकै उपहास हो। लोकतान्त्रिक पद्दतिको आत्मा मानिने शक्ति पृथकिकरणको मान्यतामाथिको नाङ्गो आक्रमण हो।

यो, कोरोना विपद्का बेला समेत चरम भ्रष्टाचार हुँदा र सरकारले गरिरहेको नेतृत्व बढ्दोरूपमा विफल देखिँदै जाँदा राजनीतिक स्थिरतामा आँच पुऱ्याउन हुँदैन भनेर प्रधानमन्त्रीलाई निरन्तर साथ दिइरहेका जनताको घोर अपमान हो।

सिँगो नेपाली राजनीतिक वृत्तमाथि नै आम जनमानसमा चरम अविश्वास बढ्दै गएको बेला सरकारले ल्याएको उक्त अध्यादेशले नेपालको लोकतन्त्रलाई नै संकटतर्फ उन्मुख गर्न सक्छ। यसले आफ्नो असक्षमता र अकर्मण्यता छोप्न स्थापित संस्था तथा लोकतन्त्रका मूल्यमान्यतामाथि प्रहार गर्ने पुरानै नेपाली राजनीतिको शैलीकाे पुनरावृत्ति गरेको छ।

तसर्थ, आज जे भएको छ त्यो तत्कालको कदमको नतिजामात्र नभएर नेपालमा दशकौँदेखि देखिएको स्वार्थलिप्त, गैरजिम्मेवार, विकृत, विसंगतिपूर्ण, राष्ट्रघाती राजनीतिको परिणाम हो।

यो परिस्थितिलाई बदल्नका लागि आफ्नो, आफ्नो सन्तान र मातृभूमीको हित र रक्षाका लागि सबै राजनीतिकर्मी तथा आम नेपालीहरूलाई आ-आफ्ना राजनीतिक मतभेद छोडेर एक जुट हुन पनि साझा पार्टी हार्दिक अपील गर्दछ।

रवीन्द्र मिश्र
संयोजक, साझा पार्टी
मिति: ०९ वैशाख २०७७

फेसबुक प्रतिक्रिया

धेरै पढिएका सामाग्री

फेसबुक प्रतिक्रिया